Облуста “Ыйык Ысык-Көлүбүздүн тазалыгы үчүн” акциясы өтүп жатат
Бишкек,30-апрель /Кабар/. Ысык-Көл облусунда “Биз бул жерде жашайбыз” деген ураан астында айлананы, көл жээгин тазалоо жана көчөлөрдү жашылдандыруу иштери өтүп жатат. Бул тууралуу облустун мамлекеттик администрациясынын басма сөз катчысы Назира Муканбетова билдирди .
“Бул акциянын максаты-жергиликтүү жашоочуларды көлдүн жээгин тазалоого, коомдук жерлерди ирээтке келтирүүгө жана жашылдандыруу ишине активдүү катышууга үндөө менен бирге маданияттуу жашоо образына чакыруу болуп саналат”,- деп белгиледи Н.Муканбетова.
Анын айтымына караганда, Ысык-Көл облустук мамлекеттик администрация ушул акциянын алкагында эле “Мен туулган жеримдин тазалыгы үчүн!” кароо-сынагын өткөрүп жатат. Анын жыйынтыгы жакынкы күндөрдө чыгат. Бул кароо-сынакка 800 миң сом каражат бөлүнгөн.
