Бишкек, 08.04.26. /Кабар/. Кечээ Жогорку Кеңештин 17 депутаты "Учкун" ААКсына барып, жалпы жарандык паспортторду, ID-карталарды жана айдоочулук күбөлүктөрдү даярдоо процесси менен таанышты. Бул тууралуу Жогорку Кеңештин бүгүнкү жыйынында депутат Бактияр Калпаев билдирди.
Ал буга чейин бул документтердин бири Россияда, бири Казакстанда, айрымдары Европа өлкөлөрүндө чыгарылып келгенин айтты.
"Кечээ документтердин өз өлкөбүздө чыгып жатканын көрүп сыймыктанып, мамлекетибизде жакшы иштер болуп жатканына күбө болуп келдик. Кыргызстанда ушундай иштер болуп жаткандыгы бизди сүйүндүрөт. Баарыбыздын максатыбыз Кыргызстаныбызды өнүктүрүү", — деп белгиледи депутат.
