Бишкек, 14.05.26 /Кабар/. Юстиция министрлиги үй-бүлөлүк зомбулукка каршы күрөшүүдө негизги курал боло турган электрондук түзүлүштөрдү сыноодон өткөрө баштады. Министрликтин маалыматы боюнча, жаңы технологиялар убактылуу коргоо ордеринин аткарылышын көзөмөлдөөгө мүмкүндүк берет.
Юстиция министрлигинин Пробациялык жана соттук-эксперттик иштер чөйрөсүндөгү саясат башкармалыгынын башчысы Руслан Романовдун айтымында, электрондук билериктер аралыктан башкаруу принциби боюнча иштейт, зомбулук көрсөткөн адамдын геолокациясын үзгүлтүксүз көзөмөлдөйт. Эгерде кылмышкер жабырлануучуга сот же милиция тарабынан белгиленген аралыктан жакыныраак жакындаганга аракет кылса, программа бул фактыны дароо жазып алып, Юстиция министрлигинин мониторинг борборуна укук бузуу жөнүндө кабар жөнөтөт.
"Билерик тагынган адам үчүн чектер аныкталат: өтпөй турган турган жерлер жана барууга тыюу салынган жерлер. Бул жабырлануучуну айыпталуучу менен жолугушуусун толугу менен алдын алат", - деп түшүндүрдү Руслан Романов.
Юстиция министри Аяз Баетов белгилегендей, билерикти алып салуу, бузуу же өчүрүү аракети болгон учурда, автоматтык түрдө шашылыш эскертүү берилет. Санариптик байкоо системасынын шарттарын бузуу 14 күнгө чейин камакка алууга алып келиши мүмкүн.
"Биздин кызматкерлер айыпталуучулардын жайгашкан жерин Кыргызстан боюнча күнү-түнү көзөмөлдөп, ал тургай алардын ылдамдыгын жана батареясынын деңгээлин аныктайт. Учурда биз импорттолгон жабдуулардан баш тартуу жана бюджеттик каражаттарды үнөмдөө үчүн өзүбүздүн өндүрүштөн чыгарылган билериктерди сынап жатабыз", - деди министр.
Мындан тышкары, Кыргызстан электрондук билериктерди гана эмес, башка көптөгөн өлкөлөрдө жок "Мобилдик көзөмөл" тиркемесин да колдонот.
Аяз Баетовдун айтымында, Кыргызстан мындай системаны ишке ашырган алгачкы өлкөлөрдүн бири болуп, БУУнун жогорку баасына ээ болгон.
Белгилей кетсек, Кыргызстандагы электрондук мониторинг үй камагындагы айыпталуучулар, пробация менен эркинен ажыратылгандар, шарттуу түрдө бошотулгандар жана үй-бүлөлүк зомбулук көрсөткөндөр үчүн алардын жайгашкан жерин алыстан көзөмөлдөө жана соттун чечимдеринин аткарылышын камсыз кылуу максатында колдонулат.
