Бишкек, 14.05.26. /Кабар/. Кыргызстанда Юстиция үйлөрүн куруу жана модернизациялоо боюнча масштабдуу долбоор ишке ашырылууда. Бул тууралуу юстиция министри Аяз Баетов "Ачык кабинет" долбоорунун алкагында айтып берди.
Анын айтымында, жаңы борборлор мамлекеттик нотариустарды, адвокаттарды, пробация кызматын жана агенттиктин аймактык бөлүмдөрүн бир чатырдын астында бириктирип, "бир терезе" катары иштеп жатат.
Мындан тышкары, өлкө боюнча жалпы аянты 11 миң чарчы метр болгон дагы 14 Юстиция үйү ачылат.
- Баткен облусу: Баткен шаарында үч кабаттуу Юстиция үйү өз эшигин ачып, 2025-жылдын 31-августунан бери жарандарды кабыл алууда.
- Жалал-Абад облусу: Жумуш эки объект боюнча жүрүүдө. Манас шаарында төрт кабаттуу имарат 2026-жылдын 5-мартында пайдаланууга берилди. Токтогул районунда курулушту ушул жылдын аягына чейин бүтүрүү пландалууда.
- Талас облусу: Талас шаарында эки кабаттуу борбор 2026-жылдын 24-мартынан бери иштеп жатат. Кызыл-Адыр айылында учурда документтер даярдалууда, курулуштун өзү 2026-2027-жылдардын ичинде башталат.
- Ысык-Көл облусу: Каракол шаарында төрт кабаттуу имараттын курулушу аяктап жатат, ал ушул жылы ачылат. Чолпон-Ата шаарында долбоорлоо иштери жүрүүдө, курулушту 2026-2027-жылдары баштоо пландалган.
- Нарын облусу: Бул жерде бир убакта үч жер жаңыланууда. Нарын шаарында жана Кочкор айылында борборлор 2026-жылдын үчүнчү чейрегинде ачылат. Ак-Талаа районунда учурда долбоорлоо баскычы жүрүп жатат, курулуш иштери 2026-2027-жылдарга белгиленген.
- Чүй облусу жана Бишкек шаары: Кара-Балта шаарында жаңы объект 2026-жылдын аягына чейин пайдаланууга берилет. Борбордогу "Ынтымак" конушунда курулуш үчүн долбоор даярдалып жатат, ал 2026-2027-жылдары башталат. Мындан сырткары, Бишкек шаарынын Валиханов көчөсүндө жайгашкан аянты 3,5 миң чарчы метрден ашкан ири имараттын капиталдык оңдоо иштери толугу менен аяктады.
- Ош облусу: Ош шаарында жеке инвестор менен биргеликте заманбап ири комплекс курулууда. Аны 2026-жылы ишке киргизүү пландалып жатат.
