Бишкек, 21.05.26. /Кабар/. Баткен облусунун башчысы Мамыржан Рахимов Бириккен Улуттар Уюмунун Кыргызстандагы башкы координатору Антье Граве менен жолугушту. Бул тууралуу облустук өкүлчүлүктөн билдиришти.
Жолугушууда БУУнун колдоосу менен Баткенде ишке ашып жаткан уникалдуу жана маанилүү экологиялык долбоорлор тууралуу сөз болду.
Эл аралык уюмдун көмөгү менен аймакта суу тартыштыгын чечүү жана жаратылышты коргоо багытында төмөнкүдөй чоң иштер аткарылган:
- 7 жасалма мөңгү курулду: Жасалма мөңгүлөр кышында сууну тоңдуруп топтоп, жаз-жай айларында эрип, дыйкандардын эгин сугаруусуна шарт түзөт.
- 10 миңден ашык тургун таза суу менен камсыз болду: Облустагы 7 пилоттук айыл өкмөткө сууну үнөмдөөчү жана тамчылатып сугаруу технологиялары киргизилди.
- Үрөн тоголоктору (seed balls) ыкмасы: Токойлорду калыбына келтирүү үчүн жаңы технология колдонулуп, Баткен жана Кадамжай райондорундагы 8 гектар жерге атайын даярдалган үрөн тоголоктору себилди.
- Аялдардын ишкердиги колдоого алынды: БУУ облустагы кыз-келиндердин өз бизнесин баштап, бутуна туруп кетишине активдүү көмөктөшүүдө.
Облус башчысы Мамыржан Рахимов БУУнун долбоорлору элдин жашоосун жакшыртууга жана климаттын өзгөрүүсүнө ыңгайлашууга чоң жардам берип жатканын белгилеп, ыраазычылык билдирди. Ошондой эле мындан ары да экология, жашыл энергия жана сууну үнөмдөө багытында биргелешип иштешүүгө кызыкдар экенин айтты.
Өз кезегинде БУУнун өкүлү Антье Граве Баткендин географиялык абалы абдан стратегиялык мааниге ээ экенин баса белгилеп, уюм бул аймакка мындан ары да өзгөчө көңүл буруп, колдоо көрсөтө берерин убада кылды.
