Финансы министри Руслан Сүйналиев 25-май күнү "Ачык кабинет: жоопкерчилик аймагы" медиадолбоорунун алкагында жалпыга маалымдоо каражаттарынын өкүлдөрү менен бир жумушчу күнүн өткөрдү. Министр пландалган кеңешмелерди жана жолугушууларды өткөрүп, ошондой эле алардын ишмердүүлүгүн текшерүү үчүн Бишкек шаарындагы жана Чүй облусундагы бир катар объекттерге барды.
Руслан Сүйналиевдин иш графиги адаттагыдай эле таң эртеден кеч киргенге чейин пландалган. Бул күнү анын жумушчу программасы "Биринчи радиодогу" түз эфирден башталды. Интервью учурунда ал өлкөнүн бардык аймактарынан радио угармандардан түшкөн актуалдуу суроолорго реалдуу убакыт режиминде жооп берди.
Андан соң Финансы министрлигинин борбордук аппаратында басма сөз өкүлдөрү менен жолугушуусу орун алды. Ведомство башчысы ЖМК өкүлдөрү үчүн имарат ичине кыскача экскурсия уюштуруп, андан кийин ачык диалог форматында күн тартибиндеги актуалдуу маселелер, учурдагы жыйынтыктар жана министрликтин ишмердүүлүгүнүн негизги багыттары тууралуу маалымат берди.
Кийинчерээк ведомство башчысы райондук финансы башкармалыктарынын жетекчилери менен онлайн кеңешме өткөрдү. Жолугушуунун жүрүшүндө аймактык өкүлдөр Кыргызстандын Эгемендүүлүк күнүн Талас облусунда белгилөөнү уюштурууга, ошондой эле ШКУнун алдыдагы саммитине даярдык көрүүнүн алкагында Каракол жана Чолпон-Ата шаарларын инфраструктуралык жактан көрктөндүрүүгө багытталган бюджеттик каражаттардын максаттуу бөлүнүшү жана бөлүштүрүлүшү боюнча отчет беришти.
"Бул иштер бекитилген пландын же белгиленген иш-чаралардын алкагында гана жүргүзүлүп жаткан жок. Биздин башкы максатыбыз калктын жашоо деңгээлин жогорулатуу", — деп баса белгиледи Сүйналиев.
Кеңешменин жүрүшүндө ведомство жетекчиси бөлүнгөн миллиондордун канчалык деңгээлде максаттуу жана туура пайдаланылып жаткандыгын жана жер-жерлерге каржылоонун өз убагында түшүүсүн көзөмөлдөө маселесин да көтөрдү.
"Биз аймактарга каржылык каражаттардын бөлүнүшүнө өзгөчө көңүл буруп жатабыз. Бул республикалык бюджеттен Талас, Каракол жана Чолпон-Ата шаарларына багытталган максаттуу трансферттер болуп саналат. Каражаттар жолдорду оңдоого жана курууга, жүргүнчү ташуучу автобустарды сатып алууга жана социалдык объекттерди модернизациялоого жумшалууда. Алсак, Таласка 1 миллиард 90 миллион сом, Чолпон-Атага 1 млрд 78 млн сом, ал эми Караколго социалдык инфраструктура үчүн 679 миллион сом каралган", — деди министр.
Пресс-турдун программасы Казыналыктын жаңыланган имаратында уланды. Руслан Сүйналиев журналисттерди корпустар менен тааныштырып, ири оңдоо иштеринин жыйынтыгын көрсөтүп, модернизациялоо мамлекеттик каржыны башкаруунун ыкчамдыгын жана ачыктыгын кыйла жогорулатууга мүмкүндүк берерин белгиледи.
Мындан тышкары, ведомство жетекчиси министрликтин алдындагы Окуу борборунун аудиторияларына барды. Ошол учурда ал жерде ар кандай мамлекеттик ведомстволордун каржы бөлүмдөрүнүн кызматкерлери үчүн квалификацияны жогорулатуу курстары өтүп жаткан болчу.
Андан ары ведомство башчысынын мамлекеттик колдоо алган негизги объекттерди текшерүү иштери башталды. Алардын биринчиси академик М. Миррахимов атындагы Улуттук кардиология жана терапия борбору болду. Бул стратегиялык медициналык мекеменин капиталдык оңдоо иштери республикалык бюджеттен капиталдык салымдар беренеси боюнча каржыланууда.
Министр белгилегендей, үстүбүздөгү жылы ата мекендик саламаттык сактоону модернизациялоого 696 млн сом бөлүнгөн. Бул каражаттар өлкө боюнча 34 негизги медициналык объектке, анын ичинде Улуттук кардиология жана терапия борборуна бөлүштүрүлгөн. Учурда 401 млн сом каржыланды, бул болжол менен 57%ды түзөт.
Анын айтымында, 2023-жылдан бери капиталдык салымдарды каржылоо жарым-жартылай мамлекеттик баалуу кагаздарды чыгаруунун эсебинен ишке ашырылууда.
"Бул механизмдин алкагында медициналык борборду модернизациялоого 423 млн сом бөлүнгөн. Бүгүнкү күндө оңдоо иштери дээрлик толугу менен каржыланды, болжол менен 20–30 млн сом өздөштүрүлө элек, ал эми жумуштардын өзү 95%га аяктап калды", — деди ал.
Текшерүүнүн жүрүшүндө ведомство башчысы медициналык мекеменин негизги блокторун кыдырды. Ал жаңыланган операциялык залдарды, интенсивдүү терапия палаталарын көрүп, ошондой эле жаңы жогорку кластердик Кардиологиялык бөлүмдү ишке киргизүүгө даярдыктын жүрүшү менен деталдуу таанышты. Министрге жүрөккө татаал хирургиялык операцияларды жасоо үчүн сатылып алынган жана орнотулган жабдыктар көрсөтүлдү.
"Мамлекет тарабынан бөлүнгөн каражаттардын максаттуу жумшалып жатканына ынануу биз үчүн маанилүү болчу. Бүгүн биз бул салымдар өзүн толугу менен актаганын көрүп турабыз. Эгерде мурда жүрөк-кан тамыр системасына татаал операцияларды жасатуу үчүн биздин жарандар чет өлкөгө чыгууга аргасыз болушса, эми жаңы жогорку технологиялык жабдууларды сатып алуунун аркасында өлкө ичинде мындай операцияларды жасоо мүмкүнчүлүгү пайда болду", — деди Сүйналиев.
Андан соң финансы министринин иш сапары Ысык-Ата районундагы Ивановка айылында жайгашкан "Асыл Таш" керамика заводунда уланды. Бул ишкананы ишке киргизүү долбоору олуттуу мамлекеттик жардам алган. Финансы министрлиги мамлекеттин атынан кепил катары чыгып, бул өндүрүштү зарыл болгон каржылык ресурстар менен камсыздоого жана аймактын өнөр жай секторун өнүктүрүүнү стимулдаштырууга мүмкүндүк берди.
"Мамлекеттик каржылык холдинг 2023-жылдан бери жалпы суммасы 66 млрд сомду түзгөн 26 ири долбоорду каржылады, алардын катарына бул завод да кирди. Бүгүнкү күндө бул долбоорлордун Кыргызстандын экономикасына кошкон жалпы салымы болжол менен 113 млрд сомду түздү", - деди министр.
Руслан Суйналиевдин берген маалыматына ылайык, долбоордун жалпы суммасы 40 млн долларды түздү, анын 25 млн долларын Россия-Кыргыз өнүктүрүү фонду бөлгөн.
"Асыл Таш" заводунун директору Кубаныч Рыскелдиев билдиргендей, заводдун өндүрүштүк аянтчасы 25 миң чарчы метрди түзөт, ал эми анын суткалык кубаттуулугу 8,5 миң чарчы метрге барабар.
Анын айтымында, ишкананын чийки зат базасынын 70%ы ата мекендик компоненттерден (таш, кум жана топурак) турат, ал эми керектүү материалдардын 30%ы Россия жана Казакстандан импорттолот. Учурда завод экспорттук багытты да ийгиликтүү өнүктүрүп, продукциясын ушул эле өлкөлөргө жеткирип жатат.
Өндүрүүчүнүн арсеналында продукциянын 100дөн ашык түрү бар экени белгиленди.
"Ишкананын ийгиликтүү ишке кириши ведомстволор аралык натыйжалуу өз ара аракеттенүүнүн аркасында мүмкүн болду. Мамлекет долбоорлоодон баштап өндүрүш линияларын ишке киргизүүгө чейинки бардык этаптарда толук коштоп, бардык көзөмөлдөөчү жана уруксат берүүчү органдар менен тыгыз байланышты камсыз кылды. Учурдан пайдаланып, көрсөткөн жардамы үчүн өкмөткө ыраазычылык билдиргим келет", - деди Рыскелдиев.
Расмий иш-чаралардын программасын Япониянын Кыргызстандагы элчиси Хирано Рюити менен болгон жолугушуу жыйынтыктады. Маектешүүнүн жүрүшүндө тараптар эки тараптуу кызматташтыктын негизги маселелерин, ошондой эле каржы-экономикалык чөйрөдөгү актуалдуу күн тартибин талкуулашты.
Учурдан пайдаланып, Руслан Сүйналиев элчини алдыдагы Дүйнөлүк көчмөндөр оюндарына катышууга чакырып, Кыргызстан бул улуу этнофестивалдын конокторунун арасында Япониянын делегациясын көрүүгө кубанычта болорун белгиледи.
Муну менен министрликтин жетекчисинин иш күнү аяктаган жок. Кечки сааттарын министр кабинетте – ведомствонун ыкчам чечимин талап кылган документтердин топтомун изилдөөгө жана кол коюуга арнады.
Эскерте кетсек, "Ачык кабинет: жоопкерчилик аймагы" медиадолбоорунун максаты – аткаруу бийлигинин ишин максималдуу түрдө ачык-айкын кылуу жана мамлекеттик башкаруунун жаңы маданиятын көрсөтүү болуп саналат. Долбоор коомчулукка министрлер кабинетинин командасын расмий пресс-релиздердин алкагынан тышкары, иш үстүндө көрүүгө мүмкүнчүлүк берет.
Долбоорго министрликтердин жана ведомстволордун жетекчилери, ошондой эле президенттин облустардагы ыйгарым укуктуу өкүлдөрү катышууда.
