Бишкек, 25.05.26. /Кабар/. Индонезиянын Түштүк Сулавеси провинциясындагы Монроло тоосуна чагылган түшүп, бир турист каза болду, дагы төрт адам ар кандай жаракаттарды алды. Бул тууралуу жергиликтүү куткаруу кызматтарына шилтеме берүү менен ANTARA маалымат агенттиги билдирди.
Макассар шаарынын издөө-куткаруу башкармалыгынын башчысы Мухаммад Ариф Анвардын айтымында, каргашалуу окуя жекшемби күнү кечинде, беш туристтен турган топ деңиз деңгээлинен 1109 метр бийиктиктеги Монроло тоосунун чокусуна чыкканда болгон.
"Төрт адам аман калды, бирөө көз жумду. Каза болгон жаран Марос округунун 25 жаштагы тургуну Фаузан", — деп билдирди Анвар.
Куткаруучулардын маалыматы боюнча, туристтер тоого өйдөлөп бара жатканда аба ырайы кескин начарлап кеткен. Нөшөрлөгөн жамгырга карабай, алар чокуга чейин жетип, ал жерден сүрөткө түшүүнү чечишкен. Дал ошол убакта топту чагылган урган.
Кырсык тууралуу маалымат куткаруучуларга бир нече сааттан кийин гана жеткен. Жабыркагандарды жана каза болгон жигитти эвакуациялоо үчүн издөө-куткаруу кызматтарынан, өрт өчүрүүчүлөрдөн, медиктерден жана ыктыярчылардан турган атайын топ жөнөтүлгөн.
"Бул тоонун рельефи абдан тик жана таштак. Кээ бир тилкелер өтө татаал болгондуктан, куткаруучуларга атайын аркандарды колдонууга туура келди. Мындай техникалык кыйынчылыктардан улам эвакуация иштери кошумча убакты талап кылды", — деп кошумчалады куткаруу кызматынын башчысы.
