Бишкек, 07.04.26. /Кабар/. Orion космос кемеси Айды айланып уча баштады. Бул тууралуу Интерфакс NASA'нын маалыматына таянып жазды.
Маалыматка караганда, Artemis II миссиясынын алкагында төрт космонавтты ташыган америкалык Orion космос кемеси Айды айланып уча баштады.
Учуу учурунда экипаж илимий изилдөөлөрдү жүргүзүп, Айдын бетиндеги отуз чакты объектини сүрөткө тартат.
Учуу болжол менен жети саатка созулат жана космонавттар Айдын бетиндеги 35 объектини, ошондой эле Меркурий, Венера, Марс жана Сатурн планеталарына байкоо жүргүзөт. Жакындаганда космос кемеси Айдын бетинен 6550 чакырым алыстыкта болот.
Космонавттар Айдын күн тийген бетин болжол менен беш саат бою байкай алышат.
Экипаж Айдын батыш четинде жайгашкан Mare Orientale кратеринин өзгөчөлүктөрүн жакындан жана ар кандай бурчтардан изилдейт.
NASAнын астронавттары Рейд Уайзман, Виктор Гловер жана Кристина Кох, ошондой эле Канаданын космос агенттигинин (CSA) астронавты Жереми Хансен башкарган Орион космос кемеси өткөн жумада Флорида штатындагы космодромдон оор жүк ташуучу SLS ракетасы менен учкан.
"Артемис II" миссиясынын алкагында, Айды бир айлангандан кийин, кеме Тынч океанына түшүп, Жерге кайтып келет. Учуунун узактыгы 10 күндү түзөт.
