Бишкек, 23.05.26. /Кабар/. Ысык-Көл облусунда 100 гектар аянтта токойду калыбына келтирүү боюнча ири иштер башталат. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Аталган министрликтин Айыл чарба долбоорлорун ишке ашыруу бөлүмүнүн адистери Балыкчы токой кызматынын өкүлдөрү жана «Регионалдык жайыт жамааттарынын туруктуулугу – АДАПТ» долбоорунун алкагында окуудан өткөн токой пайдалануучулар менен жолугушту.
Жолугушуунун жүрүшүндө Балыкчы токой чарбасынын аймагында аткарыла турган иштер талкууланды. Долбоордун алкагында Кум-Булуң тилкесиндеги 100 гектар жерге ар түрдүү көчөттөрдү отургузуу пландалууда.
Долбоордун деталдары:
- Көчөттөрдүн түрү: Жалпы аянттын 80 гектарына мөмө берүүчү бак-дарактар, калган бөлүгүнө терек жана тал көчөттөрү отургузулат.
- Коргоо чаралары: Көчөттөрдүн сакталышын камсыз кылуу үчүн тилкенин айланасына жалпы узундугу 8 миң 648 метрди түзгөн темир тор тосмо орнотулат.
Аталган иш-чаралар токой экосистемаларын калыбына келтирүүгө, жаратылыш ресурстарын сактоого жана аймактын климаттын өзгөрүшүнө туруктуулугун жогорулатууга багытталган.
