Бишкек, 24.02.26. /Кабар/. Борбордук шайлоо комиссиясы бүгүнкү жыйынында Жогорку Кеңештин депутаттарынын бош мандаттарын өткөрүп берүү маселесин карады. Бул тууралуу Боршайкомдон билдиришти.
Жыйындын жыйынтыгында БШК Дүйшөнбиев Райимберди Сейдакматовичти – №14 көп мандаттуу шайлоо округу боюнча, ал эми Нышанов Жайлообай Данибаевичти – №15 көп мандаттуу шайлоо округу боюнча Жогорку Кеңештин депутаты деп тааныды.
Аталган талапкерлер расмий түрдө депутат болуп катталып, аларга белгиленген үлгүдөгү ырастама (күбөлүк) жана депутаттык төш белгилер тапшырылды.
Эске салсак, мандаттарды өткөрүп берүү тийиштүү округдардагы бош калган орундардын негизинде ишке ашырылды. Жаңы депутаттар каттоодон өткөн учурдан тартып өз ыйгарым укуктарын аткарууга киришет.
Белгилей кетсек, жаңы депутаттар өз каалоосу менен депутаттык мандатынан баш тарткан Кундузбек Сулайманов (№14 шайлоо округу) жана Нурланбек Тургунбек уулунун (№15 шайлоо округу) ордуна келди.
