Бишкек, 21.05.26 /Кабар/. 10 жыл ичинде Ысык-Көлдүн деңгээли орточо эсеп менен 47 сантиметрге төмөндөгөн. Бул тууралуу суу ресурстары, айыл чарба жана кайра иштетүү өнөр жайы министри Эрлист Акунбеков “Ачык кабинет” долбоорунун алкагында журналисттерге билдирди.
Анын айтымында, Ысык-Көлдүн суусунун деңгээли жыл мезгилдерине жараша өзгөрүп турат.
“Гидрометеорологиялык кызматтын маалыматына ылайык, акыркы 10 жыл ичинде Ысык-Көлдүн деңгээли орточо эсеп менен 47 сантиметрге төмөндөгөн. Бул билинбегени менен чоң эле айырма. Буга байланыштуу бизде ишке ашырылып жаткан долбоорлор бар. Алардын бир бөлүгү — Ысык-Көлдүн айланасында тамчылатып сугаруу системасын киргизүү. Ошондо дарыялар жана башка суулар толугу менен көлгө куя турган болот. Андан сырткары, пансионаттардан, унаа жуучу жайлардан чыккан сууларды кайрадан иштете турган долбоорлорду иштеп чыгып жатабыз”, - деди Акунбеков.
