Бишкек, 04.05.26 /Кабар/. Ички иштер министри, милициянын генерал-полковниги Улан Ниязбеков Ысык-Көл облусуна иш сапары менен барып, алдыдагы жайкы туристтик мезгилге карата ички иштер органдарынын даярдыгын текшерди.
Ведомстводон билдиришкендей, иш сапарынын алкагында министр облус аймагындагы ыкчам кырдаал менен таанышып, коомдук тартипти сактоо жана коноктордун коопсуздугун камсыздоо боюнча көрүлүп жаткан чараларды карап чыкты. Ошондой эле өздүк курамдын кызмат өтөө шарттарына жана техникалык камсыздоосуна өзгөчө көңүл бурулду.
Текшерүүнүн жыйынтыгы боюнча Улан Ниязбеков жергиликтүү милиция жетекчилерине төмөнкүдөй тапшырмаларды койду:
- Жол коопсуздугу: Трассаларда жол-транспорт кырсыктарынын алдын алуу жана көзөмөлдү күчөтүү;
- Тартип жана сервис: Туристтер жана жергиликтүү тургундар менен сылык, маданияттуу мамиледе болуу;
- Ыкчам аракеттенүү: Ар бир кайрылууга жана мыйзам бузууга тез арада чара көрүү.
"Биздин негизги милдетибиз — эс алуучулардын жана жарандарыбыздын коопсуздугун жогорку деңгээлде камсыз кылуу. Ар бир кызматкер өзүнө бекитилген аймакта жоопкерчиликтүү болушу шарт", — деп белгиледи ИИМ башчысы.
Учурда Ысык-Көл облусунда коомдук тартипти сактоо боюнча кошумча күчтөр жана каражаттарды бөлүштүрүү иштери жүрүүдө.
