Бишкек, 01.07.26. /Кабар/. Башталгыч кесиптик билим берүү системасында окуган, социалдык жактан аялуу катмардагы өспүрүмдөр үчүн жайкы эс алуу жана ден соолукту чыңдоо программасы башталды.
Агартуу министрлигинен билдиришкендей, быйылкы жайкы кампания Ысык-Көл облусунун Кош-Көл айылындагы №85 кесиптик лицейдин базасында жайгашкан "Келечек" эмгек жана эс алуу лагеринде уюштурулууда.
Программага өлкөнүн булуң-бурчунан төмөнкү категориядагы жаштар катышууда:
- реабилитациялык топтордун окуучулары;
- ата-энесинин камкордугусуз калган балдар жана майыптыгы бар өспүрүмдөр;
- турмуштук оор кырдаалга туш болгон аялуу катмардагы окуучулар.
Учурда республика боюнча 76 кесиптик лицейден жалпысынан 1 293 окуучунун жайкы эс алуусун уюштуруу боюнча өтүнмө келип түшкөн.
Лагердин алкагында окуучулар үчүн спорттук, маданий иш-чаралар, интеллектуалдык оюндар, экскурсиялар, эмгек практикасы жана лидерлик сапаттарды өнүктүрүүчү тренингдер өткөрүлөт.
Белгиленгендей, бул программа Агартуу министрлиги тарабынан жергиликтүү мамлекеттик администрациялар менен тыгыз кызматташтыкта ишке ашууда.
