Бишкек, 01.07.26. /Кабар/. Ала-Бука районунун Өрүктү айылында 275 орундуу жаңы мектептин курулушу аяктады.
Курулуш, архитектура жана турак жай-коммуналдык чарба министрлигинен билдиришкендей, заманбап билим берүү мекемеси үстүбүздөгү жылдын сентябрь айында пайдаланууга берилет.
Мамлекеттик бюджеттин эсебинен каржыланган объекттин жалпы баасы 132 млн сомду түздү. Мектептин аянты 1 665 чарчы метр, ичинде бардык шарттары менен төмөнкүлөр каралган:
- 9 окуу классы жана заманбап лаборатория;
- 103 орундуу кенен жыйындар залы;
- окуу залы бар китепкана жана ашкана;
- заманбап жабдылган спорт залы.
Курулуш иштери Мамлекеттик курулуш агенттигинин Турак жай-жарандык курулуш департаменти тарабынан толук көзөмөлдөндү.
