Бишкек, 30.03.26. /Кабар/. Бишкек шаарынын мэриясынын Билим берүү департаменти 10-апрелинден 20-апрелге чейин борбор калаада Окуу декадасын жарыялайт.
Муниципалитеттен билдиришкендей, иш-чара эл аралык Китеп күнүнө карата уюштурулууда.
Демилгенин алкагында шаардагы бардык мектептерде жана бала бакчаларда балдардын окууга болгон кызыгуусун арттырууга багытталган маданий-агартуу иш-чаралары өтөт. Программада:
- Адабий сааттар жана китеп көргөзмөлөрү;
- Белгилүү жазуучулар менен жолугушуулар;
- Көркөм окуу сынактары жана «Бирге окуйбуз» акциялары;
- Интерактивдүү сабактар жана тематикалык викториналар.
Иш-чаранын максаты - өсүп келе жаткан муундун окурмандык маданиятын калыптандыруу, дүйнө таанымын кеңейтүү жана көркөм адабиятка болгон сүйүүсүн ойготуу.
Билим берүү департаменти окуучуларды, мугалимдерди жана ата-энелерди бул агартуу демилгесине активдүү катышууга чакырат.
