Бишкек, 03.04.26. /Кабар/. Мамлекеттик бажы кызматынын төрагасы Алмамбет Шыкмаматов бүгүн Баткен облусунун Сүлүктү шаарындагы көмүр казуучу ишканалардын өкүлдөрү менен жолугушуу өткөрдү.
Жолугушуунун жүрүшүндө ишкерлер көмүр экспорттоодогу жана салык төлөөдөгү туш болгон көйгөйлөрүн ортого салышты.
Өз кезегинде "Алтынкен" ЖЧКсынын директору Каныбек Исмаилов Сүлүктү кенинен жылына 140-150 миң тонна көмүр казылып алынарын, анын 80%ы Тажикстан менен Өзбекстанга экспорттолорун белгиледи.
"Казылып жаткан көмүрдүн сапаты абдан жогору, бирок ортомчулар көмүрдүн баасына дагы 60 доллар кошуп алышат, бул продукциянын кымбатташына алып келүүдө. Акыркы 5 жылда мамлекет тарабынан текшерүүлөр өтө көп болду. Көптөгөн компаниялар жабылып жатат", — деди ал.
Талкуунун жыйынтыгында Алмамбет Шыкмаматов көмүр казуучу компанияларга бирдиктүү салык режимине өтүүнү сунуштады.
