Бишкек, 01.04.26. /Кабар/. “Жыргалаң” тоо-лыжа курортунда асма аркан жолдун кабиналары илинди. Бул тууралуу “Ала-Тоо Резорт” ААКтан билдиришти.
Маалыматка ылайык, асма аркан жолдун В1 жана В2 линияларында эми тесттик иштер жүргүзүлөт. Алар Австриянын Doppelmayr компаниясы тарабынан чыгарылган заманбап гондолдук кабиналар болуп саналат.
Кабиналар жогорку сапаты, ыңгайлуулугу жана эл аралык коопсуздук стандарттарына толук шайкештиги менен айырмалана тургандыгы айтылды.
Кабиналарды тесттик түрдө түрдө орнотуу адистерге бардык системаларды комплекстүү текшерүүгө мүмкүндүк берет. Атап айтсак, кыймыл механикасы, туруктуулук, асма жабдуулардын иштеши, ошондой эле коопсуздук жана башкаруу системалары каралат.
В1 жана В2 линияларындагы тесттик иштер асма аркан жолду ишке киргизүүдөн мурунку маанилүү этап болуп саналат жана жабдуулардын жүргүнчүлөрдү кабыл алууга даяр экенин тастыктайт.
