Бишкек, 14.05.26. /Кабар/. “Ала-Арча” мамлекеттик резиденциясында Шанхай кызматташтык уюмуна (ШКУ) мүчө мамлекеттердин Коопсуздук кеңештеринин катчыларынын 21-жыйыны өтүүдө.
Жыйынга ШКУга мүчө мамлекеттер — Беларусь, Индия, Иран, Казакстан, Кытай, Пакистан, Россия, Тажикстан, Өзбекстан жана Кыргызстандын Коопсуздук кеңештеринин катчылары катышууда.
Маалымдалгандай, иш-чаранын негизги максаты — ШКУга мүчө мамлекеттердин аймагындагы туруктуулукту сактоо жана заманбап чакырыктарга каршы биргелешкен чараларды талкуулоо болуп саналат.
Белгилей кетсек, аймактык коопсуздукту камсыздоодо стратегиялык мааниге ээ болгон бул иш-чара Кыргызстандын ШКУдагы төрагалыгынын алкагында өтүүдө. Жыйынга Кыргызстандын Коопсуздук кеңешинин катчысы Адилет Орозбеков модераторлук кылууда.
Эскерте кетсек, ШКУга мүчө мамлекеттердин Коопсуздук кеңештеринин катчыларынын юбилейлик 20-жыйыны өткөн жылы Кытайдын Пекин шаарында өткөн.
Шанхай кызматташтык уюму 2001-жылдын 15-июнунда Кытайдын Шанхай шаарында негизделген. Бүгүнкү күндө уюмга он мамлекет мүчө: Беларусь, Индия, Иран, Казакстан, Кытай, Кыргызстан, Пакистан, Россия, Тажикстан жана Өзбекстан.
