Бишкек, 01.07.26 /Кабар/. "Ачык кабинет: жоопкерчилик аймагы" медиадолбоорунун алкагында саламаттык сактоо министри Дамир Осмонов мамлекеттик "Эл Аман" дарыкана тармагынын филиалына барып, ал жерде дары-дармектердин санариптик маркировкалоо системасын жана көзөмөлдөө механизмдерин ишке киргизүү процесси менен таанышты.
Министр "Дары-дармек" мобилдик тиркемесин колдонуп дары-дармектерди кантип текшерүүнү көрсөтүп берди.
"Ар бир дары-дармектин уникалдуу QR коду бар. Мобилдик тиркемени колдонуп, жарандар берилген дары-дармектин Кыргызстанга мыйзамдуу түрдө импорттолгонун текшере алышат", - деп түшүндүрдү ал.
Ошондой эле Осмонов 1-июлдан 31-декабрга чейин Бишкекте Саламаттык сактоо министрлиги тарабынан пилоттук долбоор ишке ашырылып жатканын айтты. Бул долбоордун алкагында мамлекеттик кепилдиктер программасы жана кошумча милдеттүү медициналык камсыздандыруу программасы боюнча арзандатылган электрондук рецепттер менен дары-дармектер эми "Эл Аман" дарыканалары аркылуу гана жеткиликтүү болот. Буга чейин бул программалар боюнча дары-дармектер келишим түзүлгөн жеке дарыканалар аркылуу берилчү.
"Учурда мамлекеттик “Эл Аман” дарыкана тармагынын 16 филиалы арзандатылган дары-дармектерди сатууда. Биз мурда келишим боюнча иштеген жеке менчик дарыканалардын жайгашкан жерлерин талдап чыктык. Жаңы мамлекеттик дарыканалар учурдагы дарыканалар менен жакын жайгашкан, андыктан керектөөчүлөр эч кандай олуттуу ыңгайсыздыкка туш болушпайт”, - деп белгиледи министр.
Мындан тышкары, министрдин айтымында, эгерде Бишкектеги пилоттук долбоор ийгиликтүү болсо, ал өлкө боюнча кеңири жайылтылат.
“Эгерде долбоор Бишкекте натыйжалуу болуп, кошумча каражат пайда болсо, биз анын аймагын кеңейтүүнү баштайбыз. Жылдын аягына чейин иштин натыйжалуулугун жана дары-дармектердин жеткиликтүүлүгүн кылдат көзөмөлдөйбүз. Эгерде ийгиликтүү болсо, тармак өлкө боюнча ири шаарларга жайылат. Каржылоонун көбөйүшү бизге дары-дармектердин түрүн жана борбор калаада жана аймактарда дарыканалардын санын кеңейтүүгө мүмкүндүк берет”, - деп билдирди Дамир Осмонов.
