Бишкек, 01.07.26 /Кабар/. 2026-жылкы футбол боюнча дүйнө чемпионатынын 1/16 финалындагы кезектеги оюндардан кийин, турнирдин кийинки баскычына чыккан дагы үч жуп аныкталды.
Турнирдин алкагындагы эң башкы беттештердин бири Франция менен Швециянын курама командаларынын ортосунда өттү. Француздар атаандашын 3:0 эсебинде ишенимдүү жеңип, 1/8 финалга жолдомо алышты. Эсеп биринчи таймдын соңунда ачылды: 45-мүнөттө бурчтан тебилген топтон соң Килиан Мбаппе айып аянтчасында биринчи болуп жетип, таамай сокку менен эсепти ачты.
Экинчи таймда Франция оюндагы үстөмдүгүн сактап калды. 53-мүнөттө Майкл Олисе коргоочулардын ортосунан так пас берип, Брэдли Барколяны дарбазачы менен жалгыз калтырды. Чабуулчу мүмкүнчүлүктү так пайдаланып, айырманы эки топко жеткирди. 74-мүнөттө Олисенин дагы бир жыйынтыктуу пасынан кийин, Мбаппе кооз сокку менен экинчи голун киргизип, беттештин акыркы эсебин койду. Бул гол Франциянын капитаны үчүн ушул дүйнө чемпионатындагы алтынчы, ал эми дүйнө чемпионаттарындагы жалпы 18-голу болду.
1/8 финалда Франция Парагвай менен беттешет. Түштүк америкалыктар Германияны сенсациялуу түрдө пенальтилер сериясында жеңип, кийинки баскычка чыкты. Негизги убакыт 1:1 эсебинде аяктап, пенальтилерде Парагвай 4:3 эсебинде жеңишке жетишти.
1/8 финалдын дагы бир жубун Канада менен Марокко түздү. Канадалыктар мурунку баскычта Түштүк Африканы 1:0 эсебинде утса, Марокко Нидерланддарды негизги убакыттан кийин (1:1) пенальтилер сериясында жеңди. Ошондой эле чейрек финалга чыгуу үчүн Бразилия менен Норвегия күч сынашат. Бразилия 1/16 финалда Японияны 2:1 эсебинде жеңсе, Норвегия өз тарыхында алгачкы жолу дүйнө чемпионатынын плей-офф баскычында жеңишке жетишип, Кот-д’Ивуарды 2:1 эсебинде артта калтырды.
1/8 финалдык беттештер:
- 4-июль: Канада — Марокко (Хьюстон);
- 5-июлга караган түн: Франция — Парагвай (Филадельфия);
- 6-июлга караган түн: Бразилия — Норвегия (Ист-Ратерфорд).
