Бишкек, 02.05.26. /Кабар/. Кыргызстандын президентинин өзгөчө тапшырмалар боюнча атайын өкүлү Бакыт Төрөбаевдин Кытайга болгон иш сапарынын алкагында Ханчжоу шаарында Кыргызстан менен Чжецзян провинциясынын аймактары ортосундагы практикалык кызматташтыкты кеңейтүүгө багытталган бир катар эки тараптуу иш-чаралар өткөрүлдү.
Бакыт Төрөбаев Чжецзян провинциясынын губернатору Лю Цзэ менен жолукту. Жолугушууда тараптар аймактык кызматташтыкты тереңдетүү жана ишкердик байланыштарды бекемдөөнүн перспективаларын талкуулашты.
Айрыкча санариптештирүү, логистика, энергетика жана транспорт сыяктуу артыкчылыктуу тармактарда кызматташтыкты өнүктүрүүгө өзгөчө көңүл бурулду. Кытай тарап Кыргызстандын аймактары менен түз байланыштарды кеңейтүүгө, анын ичинде Ханчжоу менен Ош шаарларынын ортосунда эгиз шаар мамилесин түзүүгө кызыкдар экенин билдирди.
Жолугушуудан кийин Чжецзян провинциясынын делегациясынын Кыргызстанга кайтарым сапарын уюштуруу боюнча макулдашылып, ага Alibaba, Geely жана башка ири компаниялар сыяктуу алдыңкы аймактык ишканалар катышат.
Ханчжоу шаарында Кыргыз-Кытай бизнес-форуму өтүп, ага 150дөн ашык компания катышты. Өз сөзүндө Бакыт Төрөбаев Кыргызстандын туруктуу экономикалык өсүшүн, инвестициялык климатты жакшыртууга багытталган реформаларды жана инвесторлорго көрсөтүлүп жаткан мамлекеттик колдоо чараларын белгиледи.
Кытай компаниялары биргелешкен инвестициялык жана соода долбоорлорун ишке ашырууга чоң кызыгуу көрсөтүштү. Форумдун катышуучуларына конкреттүү демилгелерди талкуулоого, кызыкчылык жараткан суроолорду берүүгө жана кыргыз делегациясынын өкүлдөрү менен ишкердик байланыштарды түзүүгө мүмкүнчүлүк берилди.
Иш-чара конструктивдүү жана ишкердик маанайда өттү, бул тараптардын практикалык кызматташтыкты бекемдөөгө болгон өз ара кызыкчылыгын тастыктады.
