Бишкек, 03.07.26 /Кабар/. Ош шаарындагы Сулайман-Тоо муниципалдык аймагында жайгашкан "Тешик-Таш" мөмө-жемиш базарында азык-түлүк коопсуздугу боюнча мониторинг жүргүзүлдү.
Айыл чарба министрлигинен билдиришкендей, иш-чаранын жүрүшүндө базарда 4 мөмө-жемиш сатуучу жана сүт азыктарын саткан 1 соода түйүнү иш алып барып жатканы аныкталды.
Инспекторлор соодагерлерге продукцияны сатыкка чыгаруунун алдында сөзсүз түрдө ветеринардык-санитардык лабораториядан өткөрүү зарылдыгын эскертишти. Өзгөчө мөмө-жемиштерди нитраттардын калдыктарына текшерүү милдеттүү экени белгиленди.
Ошондой эле сүт азыктарын саткан соода түйүнүнүн ээсине продукцияны бруцеллез оорусуна каршы үзгүлтүксүз лабораториялык текшерүүдөн өткөрүп туруу зарылдыгы боюнча түшүндүрүү иштери жүргүзүлдү.
